Jetimja nuk e beson ende, Elvisi: Të mbetet të bëhesh mësuese, shtëpinë ta dhanë shqiptarët

 Jetimja nuk e beson ende, Elvisi: Të mbetet të bëhesh mësuese, shtëpinë ta dhanë shqiptarët

Më në fund erdhi momenti që Maria me të bijën të largohen nga kjo shtëpi qerpiqi, që pikon ujë dhe ofron vetëm të ftohtin.

Elvisi, Fatma, Maria dhe e bija nisen nga fshati Krutje drejt Lushnjes, atje ku i pret surpriza. Një surprizë e bërë, nga copëzat e zemërgjerësisë së shumë shqiptarëve. Në shkallët e pallatit ku do të jetojnë Maria e Kela, kanë dalë disa fqinj që i mirëpresin.

Edhe pak shkallë dhe do të mbarojë më në fund lodhja, vuajtjet dhe hallet që sillte një shtëpi qerpiqi, pa drita dhe pa kulm.

Fatma i jep 11 vjeçares çelësin e shtëpisë së saj të re. Një mrekulli tjetër e shqiptarëve. Kela hyn e para dhe sheh përreth. Ende nuk i besohet se më në fund, nuk do të ketë më në kurriz errësirën, netët e ftohta dhe të mësuarit me qiri.

Maria: Falenderoj të gjithë stafin tuaj, të gjithë shqiptarët që kontribuan për mua dhe vajzën time, shumë faleminderit.

Fatma: Këtu do të jeni të sigurta. Nuk do t’ju pikojë më tavani e nuk do të keni më ftohtë. Keni komshinj e njerëz rreth e përqark, jeni afër qendrës së qytetit të Lushnjes e jo më atje larg në fshat.

Elvisi: Shpresoj të jetoni të lumtur. Tani të mbetet vetëm të bëhesh mësuese.

Elvis Naçi i thotë Marias e Kelës që do të mendohet dhe për një pension për ta, në mënyrë që të jetojnë, më në fund, në kushte njerëzore.

Elvis Naçi: Tani besoj nuk mund të thuash nuk jam e barabartë me të tjerët. Të siguroj se shumë fëmijë nuk e kanë shtëpinë kaq të bukur. Do ta shikosh vetë, kur të ikim ne e të flesh këtu natën e parë, të dytë e të tretë, atëherë do ta besosh se kjo është shtëpia jote. Ne do të mendojmë për një pension patjetër për ju të dy.

Maria: Unë jam e kënaqur dhe me kaq. Jam shumë e gëzuar për vajzën më shumë, se puna ime iku. Për vajzën jam e lumtur, se ajo ka vuajtur.

Elvis Naçi: Vajzën e ke të mrekullueshme. Mos e lër shkollën dhe neve do të na kesh pranë, pasi ne po bëjmë dhe disa projekte për arsimin.