Operacioni në Zagreb përfundoi me sukses, “Shqiptarët për shqiptarët” bëjnë Dianën me shtëpi të re

Të gjithë e mbani mend Dianën, vajzën 13 vjeçare me skoliozë, historia e së cilës mori përmasa ndërkombëtare. Një thirrje për ndihmë nga shokët e klasës nga ndryshoi kryëkeput jetën e saj. Emisioni “Shqiptarët për shqiptarët” u rikthye sërish tek ajo. Kemi përcjellur gjatë emisioneve të kaluara gjithçka ka ndodhur në Zagreb të Kroacisë ku u operua nga skolioza.

Kemi treguar edhe vizitorët specialë, përkujdesen që kanë treguar mjekët dhe kryetari i bashkisë së Zagrebit Milan Bandiç, i cili e vizitoi dhe i dhuroi një celular. Diana jonë tashmë ka dalë nga spitali por jo si një 13 vjeçare e zakonshme por si një zonjush e vërtetë dhe si nje person publik që rrëmbeu me historinë e saj të dhimbshme gjithë dritat e kamerave kroate. Së bashku me drejtoreshën ë saj që nuk iu nda asnjë çast, Diana u prit në zyrë nga Kryetari i Bashkisë së Zagrebit Bandiç, si të ishte pjesë e rëndësishme e një delegacioni zyrtar nga Shqipëria.

Është ulur si një përfaqësuese e lartë e shtetit mes zyrtarëve të tjerë të bashkisë. Surprizat dhe dhuratat për të nuk kanë mbaruar pasi kreu i bashkisë Bandiç i dhuroi një arush gjigand. Ai i premtoi Dianës se së shpejti do ti mundësojë asaj, vëllezërve dhe babait si dhe shokëve dhe shoqeve të klasës një vizitë turistike në Zagreb. E kemi ndjekur me kamer edhe kur zbriti në aeroportin e Rinasit. Diana mbërriti me shpinën drejtë dhe me drejtoreshën e shkollës pranë. Në dorë shtrëngonte arushin e madh pellushi.

Gjëja e parë që donte të bënte ishte ti telefononte babai të saj. E lajmëroi që kishte mbërritur. “I them faleminderit Elvisit që më ka shëruar dhe më ka plotësuar dëshirat thotë Diana. 10 ditët e qëndrimit te saj në Zagreb kanë qenë të vështira. Por në fund gjithçka shkoi me sukses. Faza pas operacionit ka qenë e vështirë por gjithçka u kalua me sukses. Kamera e “Shqiptarët për shqiptarët” e shoqëroi Dianën në Lezhë, drejt shtëpisë së saj ku e priste i ati, vëllezërit dhe hallat.