Punonin bashkë në të njëjtin vend, dy shoqet mësojnë se janë motra biologjike

Të dyja ishin të adoptuara nga familje të ndryshme, por fati e desh që rrugët e tyre të kryqëzoheshin në të njëjtin vend pune.

Kjo është historia e Xhulia Tinetit dhe Kasandra Medisonit, dy vajza nga Konektikati i SHBA-ve. Dy vajzat në të 30-tat u njohën në vendin e punës dhe menjëherë u bënë shoqe të ngushta.

“Filluam të shoqëroheshim së bashku. Mes nesh kishte një kimi, një lidhje të ngrohtë”-tha për emisionin Good Morning America, njëra prej dy vajzave.

Shumë prej kolegëve të punës i vunë në dukje ngjashmëritë fizike, kësisoj dy shoqet e ngushta nisën të kërkojmë më shumë mbi të shkuarën e tyre. Fillimisht nisi si një ‘aventurë’, por shumë shpejt gjithçka do të ndryshonte.

Njëra prej vajzave (Kasandra) arriti të gjejë në Republikën Domenikane të atin biologjik. Ai i tha se Kasandra ka patur dhe një motër, e cila u dha për adoptim po ashtu.

 “Ishte ndoshta një nga situatat më emocionale që kam kaluar ndonjëherë.. Babai im biologjik erdhi e më përqafoi. Nuk më lëshonte dhe as unë nuk e lëshova”-tha Kasandra.

32 vjeçarja mësoi se kishte tre vëllezër dhe 5 motra. Familja kishte marrë vendimin për t’i adoptuar dy vajza, për shkak të varfërisë.

Me të mësuar këtë, Kasandra tashmë dyshonte seriozisht se shoqja e saj e ngushtë, mund të ishte diçka më shumë. Ajo arriti ta bindë Xhulian për të kryer një test ADN-je së bashku. Rezultatet zbuluan se të dyja ishin motra biologjike.