Brenda orës! Shoferi shqiptar gjobitet dy herë për tejkalim të shpejtësisë

Ky sezon veror ka sjellë një numër të shtuar të aksidenteve në Shqipëri, njëlloj dhe në Kosovë, ku jo të paktë kanë qenë jetët e humbura e personat e lënduar në rrugët e vendit.

Mbi arsyet se përse vende kaq të vogla si Shqipëria apo Kosova, regjistrojnë kaq shumë aksidente, do të duhet mbase një studim i detajuar dhe i thellë.

Por po sjellim në vëmendje të lexuesit, rastin e një shtetasi në Kosovë, një rast që më së paku mund të cilësohet si i pazakontë.

Policia e Ferizajt e ndaloi shoferin në orët e para të mëngjesit. Ky i fundit udhëtonte me një automjet udhëtarësh. Ishte me shpejtësi 129 km/h në rrugën Shtime- Ferizaj, pranë fshatit Koshare. Në këtë rrugë, norma e lejuar e shpejtësisë është 50 km/h.

Në lidhje me shkeljen e rregullave, shoferi 49 vjeçar mori një gjobë (300 euro), dy pikë të hequra nga patenta dhe 6 muaj masë për heqje patente.

Pasi mori gjobë dhe masat ndëshkuese, shoferi u nis me makinën. Po i njëjti veçse, u gjobit pak minuta më tutje. Po ecte sërish me 102 km/h… në të njëjtën zonë ku duhej të udhëtonte me 50km/h. Policia e bëri matjen e dytë sërish me radar, e ndaloi dhe e gjobiti sërish (me 150 euro).

Policia e Ferizajt e përcolli rastin me qëllimin e apelimit për shoferët, që të respektojnë rregullat.