Lirohet nga paraburgimi një prej të dyshuarve për tragjedinë në Gllogjan

Është liruar nga paraburgimi njëri nga tre të dyshuarit për vrasjen e trefishtë që ndodhi në Gllogjan të Deçanit, në nëntor të vitit 2021 . Atij i është zëvendësuar masa e paraburgimit me atë të arrestit shtëpiak, vendim i marrë nga Gjykata Themelore në Pejë.

Ndërkohë dy të dyshuarve të tjerë do t’i vijojë paraburgimi edhe për 60 ditë, detaj i konfirmuar nga zëdhënësja e Gjykatës themelore në Pejë, Tringa Zhuti.

Tre të arrestuarit janë familjarë mes tyre (babai me dy djemtë). Personi që do të vazhdojë arrestin shtëpiak është M. M ndërsa babai dhe vëllai i tij do të vazhdojnë paraburgimin.

Më 12 dhjetor, autoritetet arrestuan H.M. dhe dy djemtë e tij, K. dhe M. M. nga Gllogjani. Të arrestuarve u është konfiskuar një pistoletë dhe një pushkë kallashnikov.

Mbrëmjen e 26 nëntorit, tre persona humbën jetën nga të shtënat me breshëri drejt një autobusi. Viktimë mbeti shoferi dhe dy nxënës.