Mbetën në trafik rrugës për në spital… babai bëhet “mjek” dhe sjell në jetë vajzën

Një 44 vjeçar ka arritur të sjellë në jetë fëmijën e tij të dytë, ndërsa ai dhe e shoqja mbetën të bllokuar në trafik rrugës për në spital.

Dominiku u bë vetë “mjeku”, në pamundësi për të mbërritur në kohë në spital. E kjo nuk ishte hera e parë që ky baba sillte në jetë një fëmijë, pasi djali i çiftit kishte lindur në shtëpinë e tyre, sigurisht me ndihmën e 44 vjeçarit.

Por kësaj here çifti ishte përgatitur për të shkuar në spital për vajzën, veçse një ‘e papritur’ gjatë rrugës, e detyroi 44 vjeçarin që të sillte sërish në jetë fëmijën.

Rruga ku ata po kalonin ishte në rikonstruksion. Çifti mbeti në trafik e nuk kishte se çfarë të bënte, fëmija po vinte.

“Duhet të ndalonim, aq ishte, fëmija po vinte. Mendimi i parë që më shkoi në mendje… mos, jo edhe njëherë kjo… herën e parë me djalin gjithçka ishte aty ku duhej. Ambulanca po vinte dhe isha në kontakt të vazhdueshm me mjekët, por kësaj here kishim mbetur në rrugë, në mes të natës.”-kujton me humor 44 vjeçari.

Por puna e Dominikut është disi e ‘kundërt’ me punën e një gjinekologu. Prej 30 vitesh, 44 vjeçari punon si drejtues i një shërbimi funeral. Siç tregoi ai, puna e ndihmoi që të ishte i qetë edhe pse “në disa momente paniku më merrte me vete”.

Fatmirësisht gjithçka shkoi mirë dhe drejtuesi i shërbimit funeral, solli në jetë vajzën e tij. Kur e pyesin Dominikun a ka ndërmend të bëjë sërish fëmijë, ai është kundër.

“Jo kaq është mirë, nuk dua më fëmijë”