“Shumë prej tyre janë në ankth” Gruaja që ndihmon nënat që rrisin të vetme fëmijët
Përgjatë viteve të fundit ndër shqiptari, numri i divorceve është rritur. E me thyerjen e një martese, më të dëmtuarit mbeten fëmijët, të cilët në shumë raste braktisen.
E shtyrë nga përvoja e saj me divorcin e rritjen e fëmijës me forcat e veta, një 43 vjeçare nga Prishtina vendosi të krijojë një shoqatë, për t’i ardhur në ndihmë grave që detyrohen t’i rrisin të vetme fëmijët (nënë vetëushqyese).
“Jam Arjeta Gashi, drejtoreshë e Shoqatës së Prindërve të Ndarë në Kosovë. 8 vite më parë unë personalisht kalova në divorc. Natyrisht që ka qenë shumë e vështirë, përveçse përfundon një problem, një martesë e dështuar, fillon nevoja për çështjen e kujdestarisë së fëmijës, paraqitet nevoja për ushqimin, ndarjen e pasurisë e të tjera. Unë kam hasur në shumë vështirësi.”-tha Arjeta në intervistë për Radio Evropa e Lirë.
Pas eksperiencës së saj të vështirë, Arjeta hapi shoqatën me idenë e shërbimit e përkujdesjes së grave që patën të njëjtin fat si ajo.
“Ne në fokus kemi gjykatën, sepse problemet kryesore rrjedhin nga vetë drejtësi. Më tutje japim shërbime apo trajtime psikologjike. I informojmë nënat për të drejtat e tyre rreth divorcit, rreth kujdestarisë së fëmijëve, rreth qendrave të punës sociale. Kemi arritur t’i ulim kriteret apo t’i ndryshojmë ato, që nënat vetëushqyese të kenë qasje në skemat sociale.”-tregon Arjeta.
Afro 1 vit më parë, nënat që mbanin të vetme fëmijët merrnin 90 euro ndihmë sociale, vetëm me vendim të gjykatës, por me ndryshimet e iniciuara nga shoqata, ato mund të bëhen pjesë e skemës sociale.
Shoqata ka arritur të ndihmojë 320 nëna të cilat kujdesen e përballen të vetme me rritjen e fëmijëve.
Natyra Agani ofron ndihmë psikologjike në shoqatë, nga prej ku thotë se ka parë mjaft raste të grave, nënave të cilat janë përballur me sprova të mëdha.
“Shumica e nënave, për të mos thënë të gjitha, kanë nivele të larta të ankthit për shkak të përvojave, abuzimeve e formave të ndryshme të dhunës. Vijnë shumë të ngarkuara…”-tregoi psikologia për REL.