25 vjeçari shqiptar qëllon të ëmën me thikë, media amerikane jep detajet
Një 25 vjeçar me origjinë shqiptare është burgosur pas një krimi të shëmtuar, kryer mbi nënën e tij 54 vjeçare në shtëpinë e kësaj të fundit në Elmwood Park të New Jersey-t.
Për arsye ende të pazbardhura, 25 vjeçari i identifikuar si Emiliano Domi ka qëlluar të ëmën në kurriz me një thikë kuzhine. Siç ka treguar gruaja, goditja ndaj saj ishte krejt e papritur dhe aq e ashpër, saqë thika 15 centimetra e gjatë, është thyer në mes të shpatullave të saj.
Siç raporton media lokale, gruaja është trajtuar në një spital natën e ndërrimit të viteve dhe fatmirësisht nuk ka plagë që i rrezikojnë jetën.
Ndërkohë 25 vjeçari tentoi të arratisej, por u gjet dhe arrestua jo shumë larg banesës nga policia. I dyshuari punonte si një kashier në një market dhe sipas autoriteteve atje, kishte precedentë të dhunës në familje.
I riu akuzohet tashmë me tentativë vrasje, sulm të agravuar dhe një sërë akuzash për armëmbajtje.