“6 poçari kanë mbetur në Shqipëri” Rrëfimi i një punëtori për zanatin që po zhduket në vend

Zanati i poçarisë daton mijëra vjet përpara se njeriu të krijonte civilizimet e para. Në botë janë gjetur enë balte që janë bërë mbi 18 mijë vite më përpara nga dora e njeriut.

Në Shqipëri, enët e baltës i gjen shpesh nëpër muzeume. Që prej kohës së ilirëve e deri më tutje, vendi ynë ka patur të zhvilluar zanatin e poçarisë.

Por sot në shekullin e XXI, duket se ky zanat po zhduket në Shqipëri. Ata mjeshtra të mbetur, shumica janë në moshë të madhe. Këta të fundit e kanë trashëguar brez pas brezi zanatin e poçarisë, por duket se të rinjtë nuk janë më të interesuar të ndjekin këtë zanat, që përbën një art më vete.

Një prej poçarëve në Shqipëri, Leonardi, tregon se e mësoi zanatin prej të atit. Në Shqipëri thotë ai, kanë mbetur afro 6 poçari në total. Ende blihen në treg enët e gatimit, por krijimet e tjera kanë njohur një rënie të dukshme.

“Kam rreth 12 vjet në këtë profesion. E kishte babai si punishte, ustallarë të tjerë nuk kishte e vazhdova ta mësoj vetë. Enët e gatimit shiten, pastaj tek vazot për lulet e të tjera ka një rënie të blerjeve, pasi del kostoja e lartë e njerëzit janë më shumë tek plastika.”

Sa poçeri kanë mbetur në Shqipëri?

“6 poçeri… nuk ka më. Shteti duhet të stimulojë, të japë më shumë vëmendje. Si zanat është thuajse në harresë. Energjinë e kemi të shtrenjtë, e kemi me biznesin e madh, por ja që ne punojmë me dorë.”-tregoi zanatçiu në intervistë për Top Channel.