Dhimbje e lot të pafundëm, 8 vjeçari përcillet për në banesën e fundit

 Dhimbje e lot të pafundëm, 8 vjeçari përcillet për në banesën e fundit

Dhimbje e jashtëzakonshme dhe lotë të pafundëm kanë dalë sot nga shtëpia e familjes Vasiu, së bashku me trupin e vogëlushit të tyre të ndjerë.

Arkmorti i bardhë i 8 vjeçarit u rrethua nga njerëzit të veshur me të zeza dhe me trishtim të madh, në rrugëtimin drejt vendit të prehjes së Mateos.

Një humbje e parakohshme, një vrasje makabre, që kurrsesi një fëmijë 8 vjeçar s’mund ta meritonte.

Si ndodhi ngjarja tronditëse

Nëna e 8 vjeçarit u kthye nga puna dhe menjëherë vuri re mungesën e të birit. Kërkoi, por nuk arrinte ta gjente. Shkoi në polici për të denoncuar humbjen e të birit.

Ishin dyshimet e banorëve, që kishin parë 8 vjeçarin të përdorte biçikletën e Klodian Çalamanit, ato që shtynë policinë të bënte një kontroll në banesën e 38 vjeçarit.

Oficerët panë në shtëpizën e Klodianit një pjesë të dheut të ‘shqetësuar’… atje ndodhej i mbuluar në baltë 8 vjeçarit.

38 vjeçari e kishte futur në banesë vogëlushin dhe e kishte goditur me lopatë në kokë e trup, më tutje për ta groposur në cepin e oborrit.

Para hetuesve ai e pranoi krimin makabër dhe tha se fëmija e kishte sharë…

Shumë prej fqinjëve tregojnë se 38 vjeçari ishte i alkolizuar dhe njeri agresiv ndaj fëmijëve. Punonte ku të gjente dhe shpesh ndihmohej nga fqinjët, përfshi dhe nga dera e asaj familje ku ai mori jetën e një 8 vjeçari.