Itali, makina e të rinjve shqiptarë përplaset me pemën… pasagjeri 20 vjeçar në koma

Një 20 vjeçar shqiptar po lufton me vdekjen në një spital të Italisë fqinje, fill pas një aksidenti të rëndë automobilistik.

Siç raporton La Stampa, ngjarja ndodhi mes të martës e të mërkurës në Vercelli. 20 vjeçari udhëtonte si pasagjer së bashku me një 19 vjeçar, po ashtu me origjinë shqiptare. Shoferi ka humbur kontrollin e automjetit dhe është përplasur me një pemë në anë të rrugës. Shoferi 19 vjeçar nuk ka marrë plagë serioze, ndryshe nga 20 vjeçari shqiptar, i cili u dërgua me urgjencë nga ekipet mjekësore në reanimacion.

Tashmë i riu ndodhet në koma dhe po lufton për jetën e tij. Media italiane raporton se shkak i aksidentit mund të ketë qenë shpejtësia dhe fakti se rruga ka qenë e lagur për shkak të reshjeve të shiut në qytet.