Korçë, 67 vjeçari humb jetën prej zjarrit në banesë! Me lot në sy komshinjtë tregojnë çfarë ndodhi
Një 67 vjeçar ka ndërruar jetë mbrëmjen e djeshme teksa në shtëpinë e tij ra zjarri. Ngjarja e trishtë ndodhi në lagjen nr.5 të Korçës, ndërsa i moshuari humbi jetën si pasojë e asfiksisë.
Komshinjtë e tij kanë treguar për median se u mundua të ndihmojnë, por flakët dhe tymi kishin përpirë banesën ku jetonte i vetëm 67 vjeçari.
“Jetonte vetëm, vetë për vetë. Të tërë njerëzit i ka në Greqi. Ishte sëmurë, vetë për vetë. E mbesa e ka marrë në kurriz dhe e ka dërguar në spital, ajo bëri çmos por tani ka ikur në Amerikë. Gjynah shumë. Qeparë e pashë, tek dera. Ai është karshi neve. Ishte mirë…”-tha komshia e 67 vjeçarit, e prekur shumë nga ngjarja e rëndë.
“I pari që e pash (zjarrin) isha unë. Hipa mbi makinë dhe hapa dritaren. Bërtita a ka njeri. Mu përgjigj, por nuk merrej vesh se çfarë po thoshte. Më pas hapa derën e theva dy xhamat e penxheres. U mundova të hyj brenda, por aty ishte e mbuluar gjithçka me tym, s’mund të rrije një sekondë. Më pas erdhi zjarrfikësja e më shumë nuk di çfarë t’ju them”-tha një djalë në moshë të re.
Ndërkohë autoritetet dhanë këtë njoftim mbi rastin.
“Më datë 27.01.2022, rreth orës 20:45, në lagjen nr. 5, ka rënë zjarr në një banesë, ku jetonte përkohësisht shtetasi E.R., rreth 67 vjeç, i cili për pasojë dyshohet se nga asfiksia, ka gjetur vdekjen“.
E duket se të tilla raste tragjike janë shtuar në Shqipëri. Kujtojmë se disa ditë më parë, një tjetër burrë i cili jetonte i vetëm dhe vuante nga probleme të shëndetit, humbi jetën në banesën ku jetonte i vetëm për shkak të zjarrit.