“Po mbillja patate me gjyshen” Dëshmia e gruas që pa 60 vite më parë njeriun “që erdhi nga qielli’

60 vite më parë, një njeri do të shkonte për herë të parë në hapësirë. Ai ishte astronauti rus Juri Gagarin, i pari njeri që udhëtoi drejt orbitës së Tokës. Në atë kohë, beteja e parë ‘kozmike’ mes dy superfuqive (SHBA-ve e Bashkimit Sovjetik) u fitua nga sovjetikët, teksa Gagarin u bë i pari njeri në histori që doli në hapësirë.

Pas udhëtimit të tij, astronauti Gagarin ra me parashutë në këtë zonë, që 6 dekada më parë ishte një fushë me të mbjella.

Për BBC-në, ka folur gruaja që në atë kohë ishte veçse 5 vjeçe dhe po mbillte patate me gjyshen… kur papritmas nga ‘hiçi’ erdhi një njeri i veshur në ‘portokalli’.

“Gjyshja po hapte gropat, kurse unë hidhja patatet. Pashë diçka portokalli që ra pranë. Nuk e kuptova se çfare ishte, por po vinte drejt nesh… Gjyshja u frikësua. Më kapi dorën dhe u bë gati të ikte me vrap së bashku me mua.”-tha Rita Nurskanova.

“Ai na thirri ‘gjyshe ndaloni, jam rus si ju’. Mbaj mend që i thashë gjyshes ‘ndalo, po flet rusisht’.”-shtoi gruaja.

-Çfarë mban mend kur e pe në fytyrë?

“Buzëqeshjen e tij. Kishte një zë të butë. Gjyshja e pyeti sesi erdhi deri këtu dhe ai i tha me një anije.

“Po këtu nuk ka det” i tha gjyshja ime, ndërsa ai iu përgjigj duke thënë se erdhi me anije kozmike.”-tregoi Rita për BBC.