Rrëfimi emocional i veteranit të UÇK-së, kujton përballjet me forcat serbe në betejën e njohur

Një prej luftëtarëve të UÇK-së, ka rrëfyer disa prej momenteve të luftës e përballjes me forcat serbe gjatë vitit 1999, në betejën e koshares. Cen Aliçkaj tregoi se në një prej përballjeve, luftimet mes UÇK-së e forcave serbe kishin nisur me një distancë prej veçse 4 metrash.

Cen Aliçkaj ka treguar në një rrëfim për Klan Kosova, sesi kanë rënë dëshmor luftëtarët gjatë kësaj beteje, përfshi dhe heroin Xhemajl Fetahaj.

”Në maj të 1999-ës, ne kemi marrë iniciativë për eliminimin e një grupi vëzhgues të brigadës. Na kanë dhënë një informacion, jo të plotë, jo të saktë.

Na është thënë se ‘’është një njësi që bën korrigjimin e artilerisë’’, dhe në  konsultim me Hisen Berishën, kemi marrë vendim që ta eliminojmë atë pikë.

Ne jemi nis bashkë me Xhemajl Fetahajn, Milazim Shalën, Florim Matajn, Xhevdet Matajn. Kemi thënë veç një komunikim, për krejt tjetër gjë me folë, por me pasë koordinimin se për çka po flasim.

Kur jemi ngjit prej një pjese shumë të rrëshqitshme, terren shumë i thyer. Dhe kur kemi shku lartë, një pjesëtar ka lëvizë pak dhe jemi takuar me forcat serbe. Distanca ka qenë katër metra”.

Pastaj kemi nisur luftimet nga ajo distancë. Kemi asgjësuar pesë pjesëtarë të forcave serbe, që kanë qenë të pozicionuar aty.

Ata kanë filluar tërheqjen sepse mendonin që jemi një grup i  madh i luftëtarëve, ndërsa ne ishim vetëm pesë.

I pari në betejë, duke e gjuajt bombën, është goditur dhe ka rënë Milazim Shala. Pas vrasjës së tij, serbët e kuptuan se jemi pakicë dhe na u kundërpërgjigjën me gjithë arsenalin e tyre. Ne ua kishim marrë armët e tyre, zollat, ua kemi marrë kallashët që kanë pasë, dhe pas vrasjes së Milazimit ne kemi tentuar ta tërheqim atë, por aq kanë qenë në pozicion sa s’kemi mund ta tërhiqnim trupin e tij.

Isha i pajisur me armë snajper, jam detyruar me heq snajperin dhe kam gjuajtur me shënjestër mekanike. E kam paralizuar një që ka qenë aty me mitraloz.

Dhe iu kam thënë atyre që (forcat serbe) i kemi shumë afër. Sepse kam pasur një vijë me ta, me [Xhemajlin, Florimin dhe Xhevdet Matajn]. E kam heq zollën me gjuajt me një armë që është armë e fortifikuar, por në momentin që jam ngritur, një ushtar ose oficer serb ka dalur në anën bash ku e kam pasur kokën, por  fati që kam dalur në një pjesë tjetër shkëmbi që ka qenë dhe i kam gjuajt një bunker me zollë.

Pastaj iu kam thënë të tërhiqen dhe gjatë tërheqjes e kanë goditur dhe e kanë vra edhe dëshmorin, tashmë, heroin, Xhamajl Fetahajn”.-