Shikoni sesi një veprim sjell katastrofën, ‘piromani’ kapet në kamera duke ndezur zjarrin

Në shumë shtete të globit, dy muajt e fundit kanë qenë një betejë e përditshme me flakët. Në Europë, Turqia, Greqia, Italia, Shqipëria etj, janë përballur me dhjetëra vatra zjarri. Në SHBA zjarret në Kaliforni kanë djegur sipërfaqe të paimagjinueshme toke e pyjesh e mijëra banesa.

E teksa shkenca e studiuesit flasin për pasojat e rënda që po sjell ngrohja globale, në vëmendje të gjithkujt mbetet fakti se shumë zjarre, nuk vijnë nga ‘lart’, por nga dora e individit.

Në Shqipërinë tonë, që nga 25 korriku e deri më sot, janë arrestuar 15 persona, të cilët dyshohet se janë bërë shkas i zjarreve apo në rastin më të keq, i kanë ndezur qëllimisht ato.

Në Shqipëri shumë vatra zjarri kanë rrezikuar jetët e shumë qytetarëve (veçanërisht në fshatrat e Gjirokastrës). Pak ditë më parë një 64 vjeçar humbi jetën në tentativë për të shuar flakët pranë shtëpisë së tij.

Për të mos folur për dëmet në toka, bimësi apo pyjet e shkrumbuara. Ende nuk ka një bilanc të qartë për dëmet e shkaktuara nga zjarret në Shqipëri, por dëmi llogaritet në qindra hektarë të djegura përgjatë gjithë territorit të republikës.

Sërish në mendje të shkon dora e njeriut, njëlloj si ky rast i mëposhtëm, i filmuar nga kamerat. Një burrë që ulet dhe ndez me çakmakun e tij barishtet aty pranë. Një veprim krejt i vogël. I qëllimshëm. I papërgjegjshëm. Pas pak minutash, zjarri i vogël që u ndez nga dora e ‘piromanit’ merr përmasa serioze.

Pamjet janë filmuar nga një kamera e fshehtë e policisë në provincën e Beneventos dhe personi që vë zjarrin është arrestuar. Në median Italiane video është shpërndarë me shpejtësi, për të treguar në opinionin publik, sesa e kollajtë është që një zjarr i vogël, mund të përkthehet në një vatër që rrezikon jo vetëm tokën, bimësinë, pyjet, por edhe jetët e njerëzve.