14 vjet në kërkim të djalit të rrëmbyer, momenti prekës kur babai përqafon të birin
Historia prekëse e këtij babai u përkthye në një film në vitin 2014. Një histori e fortë e dashurisë së prindit për fëmijën, e dashurisë së babait për të birin.
Djali 4 vjeçar i Sunit, u rrëmbye në vitin 2007, teksa po luante fare pranë shtëpisë së tij në provincën Shenzhen (Kinë). Një burrë i ishte afruar djalit dhe e kishte gënjyer me një lodër, duke i thënë se do t’i jepte plot të tjera. E vetmja gjë me të cilën mbeti ky baba, ishte pamja e rrëmbimit të të birit, e kapur nga një kamera sigurie.
Për 14 vite ai kërkoi kudo, vuri fletushka e udhëtoi në shumë vende për të gjetur të birin. Ai tregoi se e kërkoi ndihmën e policisë menjëherë, por ata i kishin thënë se duhej të priste 24 orë për ta denoncuar. Por edhe pas denoncimit e nisjes së hetimit, babai i fëmijës tregoi se policia nuk e ndihmoi aspak, e madje se i kishin sugjeruar që kërkimet t’i bënte vetë.
U deshën 14 vite kërkime dhe dhjetëra kërkime në analizat e ADN-së, që më në fund, babai të përqafonte të birin, në një moment me të vërtetë prekës e përlotës.
Rezultoi se djali i rrëmbyer në 2007 (sot 18 vjeçar) ishte shitur nga autori në këmbim të parave. Fëmija ishte marrë nga një çift i cili e kishte rritur djalin në kushte normale të jetës. Pavarësisht, autoritetet atje, siç njofton media e huaj, janë proceduar penalisht së bashku me rrëmbyesin, i cili marrë dhe disa fëmijë të tjerë për t’i shitur, njëlloj si ky rast.