Akte të bukura në kohë të vështira…i riu me tabelë në dorë për të ndihmuar refugjatët ukrainas

Grupi i xhirimit të BBC-së ka udhëtuar drejt kufirit mes Ukrainës e Polonisë (Medika), atje ku grumbujt e njerëzve që i largohen luftës, vijojnë.

Gazetari i BBC-së takohet me disa të rinj që vinin nga Jemeni, por që studimet i bënin në Ukrainë. Ata treguan se kanë ecur të paktën 40 kilometra në këmbë. Të ulur në një cep të rrugës e të lodhur tej mase, të rinjtë tregojnë për çfarë panë.

“Situata në Ukrainë është e rëndë, nuk po tregohet mëshirë për askënd… gra e fëmijë janë mbështjellë në atë luftë kaotike’-tregoi Ahmed Omar.

Miku i tij, Muhamed, tregoi se “populli ukrainas është shumë dashamirës, por si përherë, forca brutale fiton”

Më tutje gazetari i BBC-së shikon një të ri që mban një pankartë në dorë. Pavel quhet dhe është polak.

Ai ka ardhur në kufi me makinë dhe dëshiron të ndihmojë me aq sa ka mundësi. Ai tregon se merr sa të mundet refugjatë dhe bën rolin e taksistit për ata që duan të largohen. Udhëtimet që Paveli bën për refugjatët janë falas.

Shumë njerëz kërkojnë ndihmë i tregon i riu gazetarit.

E në fakt sipas parashikimeve të bëra nga Organizata e Kombeve të Bashkuara, një numër prej mëse 1 milionë refugjatësh do të mbërrijnë në Poloni.