Elvis Naçi lutet për besimtarët e plagosur dhe për qetësi

Elvis Naçi ka reaguar në lidhje me aktin e rëndë të ndodhur në xhaminë ‘Dine Hoxha’ në Tiranë, ku një 34 vjeçar qëlloi me thikë 5 besimtarë muslimanë.

Përmes një postimi në llogarinë e tij në rrjetin social, Elvis Naçi i uron besimtarëve muslimanë të lënduar një shërim të shpejtë. Naçi përcjell dhe një mesazh për të ruajtur qetësinë, veçanërisht në këtë muaj të shenjtë të Ramazanit, ku paqja e falja duhet të mbizotërojnë mbi mendjet e zemrat e njerëzve.

“Lusim Zotin e Madherishem t’ju jape sherim të shpejtë vëllezërve tanë që u sulmuan dhe u plagosen brenda Xhamise Dine Hoxha Tirane, ne kete Ramazan te begate duhet t’i marrim gjerat me qetesi ku paqja dhe falja të mbizoterojë! Amin.”-shkruan Elvis Naçi.

Kujtojmë se në orët e drekës 34 vjeçari Rudolf Nikolla, me origjinë nga Mati, qëlloi me një thikë disa besimtarë, për arsye apo shkaqe ende të pazbardhura nga autoritetet. Babai i të riut foli në disa media dhe deklaroi se i biri vuante nga depresioni.

Fatmirësisht të pestë personat që u lënduan nuk kanë marrë plagë të rënda dhe pas kurimit në spital kanë dalë prej atje në gjendje të mirë shëndetësore.