I shpëtoi jetën në avion, mesazhi i 17 vjeçarit përlot ish- ushtarin e UÇK-së

Një zonjë kërkoi ndihmë gjatë momenteve kur avioni po ulej në aeroport. Një 17 vjeçar kishte pësuar ngulfatje pasi kishte gëlltitur gjuhën. Ish- ushtari i UÇK-së Ridvan Tahiri ishte në avion dhe shkoi të ndihmojë 17 vjeçarin, së bashku me disa bashkëudhëtarë të tjerë shqiptarë. Fatmirësisht, ish- ushtaraku i UÇK-së ka mundur t’i hapë nofullën e t’i nxjerrë gjuhën të riut, i cili në ato momente kishte humbur vetëdijen.

Së bashku me Ridvan Tahirin ishte dhe gazetari Festim Beqiri, i cili ka mundur të filmojë momentin kur adoleshentit i rivjen vetëdija.

“Në ato momente, kanë qenë duke biseduar me stjuardesën. Unë nuk jam doktor, po është përvoja që kam patur njëherë. Ai kishte gëlltitur gjuhën. Duke i kontrolluar kyçet, duhet mandej me i fol, me i ba masazh që të mos humb vetëdijen. Kam biseduar me babain e tij në Gjermani, me gjyshin e tij, me dajallarët e tij. Dua ta kem një takim me të. Unë kam një përvojë me vëllain tim, që kur ka parë trupat në Drenicë nuk ka pasur një përvojë të mirë psiqike”, u shpreh Tahiri në një lidhje për abc.

“Fillimisht nuk e kuptuam se çfarë po ndodh, po pas 10 minutash kuptuam që situata po ndërron. Unë djaloshin e njoh se jetojmë në të njëjtën qytetet. Ai është futbollist. Kur e pash, bisedova me të, ishte i mavijosur. E kam ndihmuar familjen e tij me bagazhet. Kur e kam parë kam qenë shumë i hutuar pasi e njihja djalin. Falenderoj Rikin për ndihmën që ka dhënë dhe stjuardesat, të gjithë”, tha gazetari Festim Beqiri.

17 vjeçari i ka dërguar një videomesazh Ridvanit, në shenjë falenderimi, një mesaz që e ka përlotur ish ushtarin e UÇK-së.

“Përshëndetje, desha me e falenderu Ridvan Tahirin. Në ato momente, ai ka qenë shumë i rëndësishëm për mu, se prej hakut të tij unë munden tani me fol. Mu duk sikur po flija, e kur jam çuar, e kuptova. Tani doja të të them shumë faleminderit Ridvan, familja ime shumë të falenderon dhe kam qejf të të kap për qafe sepse më shpëtove jetën. Shihemi shumë shpejt.”