Krim i rëndë në familje, 44 vjeçarja i merr jetën vjehrrës pas konfliktit të çastit

Vrasja në familje rikthehet sërish. Kësaj here ishte një grua ajo që i mori jetën një gruaje tjetër. Krimi i rëndë ka ndodhur dje në fshatin Burim të Maqellarës. Një konflikt i momentit mes 44 vjeçares me inicialet M.M dhe vjehrrës së saj, ka përfunduar në tragjedi. Nusja ka goditur të moshuarën 74 vjeçe me thikë në pjesën e fytit. E moshuara ka ndërruar jetë në vend.

Familjarët kanë lajmëruar autoritetet policore, të cilët kanë arrestuar gruan dhe bërë të mundur sekuestrimin e armës së krimit.

Një prej të afërmve tregoi për median se gruaja vuante nga probleme mendore.

Çfarë tha policia

“Goditi me mjet prerës ( thikë), vjehrrën e saj duke i shkaktuar vdekjen,  arrestohet në flagrancë nga policia  44 vjeçarja. Nga specialistët për hetimin e Krimit në Komisariatin e Policisë Dibër, u bë arrestimi në flagrancë i shtetases :  M. M., 44  vjeçe, banuese në fshatin Burrim,  Maqellarë, pasi në orët e mbrëmjes datë 11.04.2021, në banesën e saj dyshohet se për motive të dobëta,  ka goditur me mjet prerës (thikë) vjehrrën e saj, shtetasen  N. M., 74 vjeçe, e cila si pasojë e plagëve të marra ka ndërruar jetë  menjëherë.  Grupi hetimor në vendngjarje ka  sekuestruar në cilësinë e provës materiale  mjetin prerës që dyshohet  se është përdorur nga autorja e ngjarjes. Materialet procedurale iu referuan Prokurorisë Dibër për veprën penale “Vrasje për shkak të marrdhënieve familjare”,njoftoi policia.

E dyta ngjarje brenda 24 orëve, pas asaj në Kavajë

Kujtojmë se po ditën e djeshme, një 48 vjeçar mbylli të shoqen në makinë dhe më pas i vuri flakën. Gruaja u dogj e gjallë, ndërsa autori i dha fund jetës duke u vetëvarur në një pemë.