Lufta me kohën për t’i shpëtuar jetën 10 minatorëve të mbetur të bllokuar
Dhjetë minatorë kanë mbetur të bllokuar në tunelet e një miniere të hapur pak muaj më parë, ndërsa ekipet e shpëtimit kanë nisur punën për t’i nxjerrë prej aty.
Ngjarja ka ndodhur në Coahuila të Meksikës, dhe prej mëse tre ditësh, ekipet e shpëtimit po mundohen të nxjerrin të gjallë minatorët.
Mbi 300 ushtarë e personel tjetër i janë bashkuar orvatjes, përfshi këtu edhe 6 zhytës të forcave speciale.
Miniera u hap në janar dhe nuk kishte asnjë ankesë apo shkelje sipas Ministrit të Punës atje. Ndërkohë BBC ka përcjellë rrëfimin e një ish minatori, i cili tregon se kujdesi për sigurinë ka qenë i dobët.
“Ata bëjnë përherë si të duan, jam shumë i keqardhur. Por si ky rasti i tanimësh edhe në raste të tjera, ka dukshëm mungesa të sigurisë dhe kushteve të punës.”-tha ish minatori.
Ndërkohë nëna e një prej minatorëve të mbetur të bllokuar, mes lotëve tregoi se nuk di gjë për fatin e të birit.
“Im bir është aty brenda”-tha gruaja në mesin e lotëve.
Një tjetër minator, i cili ka të vëllanë të mbetur të bllokuar, tregoi se në një moment një galeri është shembur dhe minatorët janë detyruar të vrapojnë për të shpëtuar jetën. 5 minatorë kanë mundur të shpëtojnë pasi kanë qenë pranë një dalje, ndërsa të tjerët janë ende në kërkim.