Në prani të tre vajzave të mitura, 38 vjeçari bën për spital të shoqen në Levan

Një 38 vjeçar ka rrahur në mënyrë barbare të shoqern, e cila përfundoi në spital për shkak të plagëve që mori.

38 vjeçari ka dhunuar të shoqen në sy të tre vajzave të tyre të mitura, 11, 9 e 5 vjeçe. Ndërkohë vetë e dhunuara deklaroi se i shoqi e ka qëlluar vetëm me pëllëmbë, pavarësisht se ajo ka patur shenja në trup.

Media ka pyetur fqinjët e çiftit, të cilët kanë thënë se 38 vjeçari ka tentuar ta godasë me sëpatë të shoqen dhe se kjo nuk ka qenë hera e parë që gruaja është rrahur nga i shoqi. Po sipas fqinjëve, 38 vjeçari rrinte me sëpatë në dorë dhe pinte shumë alkool.

Policia e vuri në pranga të riun, banues në Levan të Fierit dhe njoftoi se gruaja pasi ka marrë mjekimin në spital është larguar për në banesë.

“Specialistët për Hetimin e Krimeve në Komisariatin e Policisë Fier arrestuan në flagrancë shtetasin S. M., 38 vjeç, banues në Levan, Fier, pasi ka ushtruar dhunë fizike dhe psikologjike ndaj bashkëshortes së tij e cila pasi ka marrë mjekim në spitalin e Fierit, është larguar për në banesë.

Materialet i kaluan Prokurorisë për veprime të mëtejshme për veprën penale “Dhunë në familje”, njofton policia.