Prishtinë, një 14 vjeçar vritet me thikë teksa shkonte në shkollë

Një ngjarje tronditëse ka ndodhur këtë të martë në Vranjevc të Prishtinës, atje ku një 14 vjeçar i identifikuar me inicialet R.H, ka gjetur vdekjen në rrethana ende të pazbardhura nga autoritetet.

Ngjarja ka ndodhur jo shumë larg shkollës ‘Hilmi Rakovica’, atje ku i mituri vijonte studimet në klasën e 9-të.

Policia e Prishtinës dha këtë njoftim mbi rastin.

” Sot rreth orës 07:30, kemi pranuar informatën për një rast vrasje, në rrugën “Fahri Fazliu”, në Prishtinë. Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore.

Bazuar në të dhënat fillestare, personi i cili dyshohet se ka marrë lëndime të rënda nga një mjet i mprehët (thikë)  dhe i njëjti është dërguar në Qendrën e mjekësisë Familjare (QMF),  ku dhe është konstatuar vdekja e tij. Vdekjen e viktimës R.H. mashkull 14 vjeç, e ka konstatuar ekipi mjekësor në QMF. Aktualisht hetuesit policor kanë nisur një hetim për sqarimin e të gjitha rrethanave që lidhen me rastin”

Ende nuk dihet se kush është personi që ka kryer krimin e rëndë, ndërsa media në Kosovë raporton se një i mitur është shoqëruar në polici. Sipas nxënësve, shokëve të klasës, 14 vjeçari me inicialet R.H ishte një djalë i urtë.