“Shoferit iu sekuestrua lëndë narkotike” Çfarë thotë policia për incidentin në sheshin Skënderbej

Policia ka dhënë një njoftim zyrtar në lidhje me ngjarjen e paprecedentë të ndodhur këtë të dielë zgjedhjesh, në sheshin ‘Skënderbej’ në Tiranë.

Autoritetet njoftojnë se shoferi i makinës që rrezikoi jetët e njerëzve është identifikuar si shtetasi A.M, 32 vjeçar. Policia thekson se i riu mund të ketë qenë nën efektin e lëndëve narkotike, pasi në makinë i është gjetur një sasi droge, e dyshuar kanabis.

Policia shtoi se 32 vjeçari ka përplasur fillimisht tre automjete dhe më pas ka hyrë në shesh duke thyer barrierat e dukë vënë në rrezik jetën e qytetarëve

Njoftimi i plotë i policisë:

Në sallën operative ka ardhur njoftim se në sheshin “Skënderbej”, një drejtues mjeti ishte duke kryer manovra të rrezikshme në rrugë, duke rrezikuar jetën e qytetarëve.

Menjëherë pas marrjes së njoftimit, në adresën e dhënë kanë shkuar shërbimet e Policisë, të cilët në bashkëpunim me Policinë Bashkiake dhe qytetarë të rastit kanë bërë të mundur neutralizimin dhe prangosjen e drejtuesit të mjetit, shtetasit A. M., 32 vjeç, i cili është shoqëruar në Komisariat, për veprime të mëtejshme hetimore.

Nga verifikimet paraprake të Policisë nuk ka persona të lënduar dhe dyshohet se drejtuesi i mjetit është nën efektin e lëndëve narkotike.

Gjithashtu, këtij shtetasi gjatë kontrollit fizik iu gjet dhe iu sekuestrua një sasi me lëndë të dyshuar kanabis.

Ky drejtues mjeti fillimisht ka përplasur tri automjete në vende të ndryshme duke shkaktuar dëme materiale dhe më pas ka thyer barrierat mbrojtëse dhe ka hyrë në sheshin “Skënderbej” duke rrezikuar seriozisht qytetarët.

Grupi hetimor ndodhet në vendngjarje dhe po punon për sqarimin e plotë të rrethanave të ngjarjes.