Tragjedia me 11 të vdekur në Malin e Zi, media e huaj zbërthen të gjithë dinamikën e ngjarjes
Media e huaj ka hedhur dritë mbi masakrën me 11 të vrarë në Cetinje të Malit të Zi, atje ku një 34 vjeçar i armatosur me një armë gjahu, nisi të qëllojë pa asnjë arsye mbi banorët e zonës
Siç ka mësuar Vijesti, 34 vjeçari Vuk Boriloviç, vrau fillimisht dy fëmijë të mitur dhe nënën e tyre. Këta të fundit jetonin me qira në një pronë të tij. Rreth orës 15:30, ai ka hyrë në banesë e ka qëlluar një fëmijë 11 vjeçar, më pas të vëllanë e vogël (8 vjeçar). Boriloviç ka qëlluar më pas nënën e fëmijëve, e cila mbeti e lënduar rëndë dhe ndërroi jetë në spital.
34 vjeçari kishte dashur të vriste dhe babain e fëmijëve, i cili në atë kohë nuk ndodhej aty.
Siç raporton Vijesti, ai e ka telefonuar këtë të fundit dhe i ka thënë “vrava familjen tënde”.
Vrasjen e fëmijëve të mitur e ka konfirmuar dhe kreu i policisë në Malin e Zi, i cili deklaroi:
“Rreth rës 3:30 të drekës, një 34 vjeçar nga Cetinje, qëlloi një familje, anëtarët e të cilës po qëndronin në një prej apartamenteve të shtëpisë së tij në Medovina. Autori ka përdodur një çifte gjahu dhe i ka marrë jetën dy fëmijëve, 11 e 8 vjeçarë. Autori plagosi dhe nënën e të miturve, e cila nuk ia doli t’i mbijetojë plagëve në spital. Më pas ai ka nisur të qëllojë mbi rezidentët e tjerë në zonën përreth, duke vrarë 7 të tjerë e duke lënë të plagosur 6 persona”
Vijesti raporton se përgjatë 45 minutave të ardhshme, në një distancë prej 80 metrash nga shtëpia e tij, 34 vjeçari qëlloi për vdekje 7 persona dhe la të plagosur 6 persona të tjerë. Pasi i mori jetën të miturve, 34 vjeçari më tutje ka shkuar në shtëpinë e fqinjëve, duke qëlluar për vdekje Danijela e Dimitrije Drecun, një çift të moshuarish. I vdekur mbeti dhe djali i të moshuarve, një 56 vjeçar. 34 vjeçari qëlloi po ashtu dhe mbi nipin e të moshuarve, një 32 vjeçar i identifikuar siç raporton Vijesti, si Aleksandar.
Më tutje autori ka shkuar në banesën e një tjetër fqinji, duke vrarë një 37 vjeçar dhe xhajën e tij, 54 vjeçar. Së fundmi, duke ecur në rrugë, 34 vjeçari ka qëlluar për vdekje dy gra, të identifikuara sipas Vijestit si motra (Aleksandra 52 vjeçe dhe Mila 51 vjeçe).
Autori ka vijuar me masakrën, duke plagosur dhe njerëz të tjerë, përfshi këtu edhe një oficer policie. Oficerët që erdhën në vendin e ngjarjes nuk mundën t’i afrohen autorit, pasi ai nisi t’i qëllojë menjëherë. 34 vjeçari madje qëlloi edhe në drejtim të mjekëve të urgjencës që erdhën për t’i dhënë ndihmën e parë të plagosurve. Sipas asaj që raporton Vijesti, 34 vjeçari vrau edhe xhaxhain e tij, i cili po mundohej të arsyetonte me të. 34 vjeçari raportohet t’i ketë thënë familjarit “tani po ta tregoj se çfarë jam duke bërë”.
Në lidhje me vrasjen e autorit të masakrës, prokurorja që po heton rastin deklaroi se nga të dhënat e deritanishme, rezulton se 34 vjeçari është vrarë nga një qytetar. Në median malazeze është raportuar mbi personin në fjalë, por prokurorja Andrijana Nastić nuk e bëri me dije identitetin e qytetarit në fjalë.
Trupi i 34 vjeçarit është dërguar në autopsi për të zbuluar shkakun dhe mënyrën e vdekjes, pasi trup autori kishte një sërë plagësh të shkaktuara nga disa plumba.
Në lidhje me motivin që e shtyu 34 vjeçarin drejt një masakre të paparë ndonjëherë në historinë e Malit të Zi, nuk ka ende një përgjigje. Drejtuesi i policisë së Malit të Zi, Zoran Brđanin tha se autoritetet po hetojnë çdo detaj dhe se informacionet do të bëhen publike për opinionin.
“Deri më tani, nuk është e qartë se çfarë e motivoi V.B për të kryer një akt kaq makabër. Vë në dukje se rrethanat e të gjithë ngjarjes, përfshi dhe vrasjen e autorit, po hetohen ende dhe publiku do të informohet përmes medias.”-tha ai.