Histori prekëse, ky 8 vjeçar mbledh donacione për shoqen e klasës, e prekur nga tumori

Një miqësi e paçmueshme. Xhesi Starr 8 vjeçar, kur mësoi se shoqja e klasës ishte e sëmurë, nisi të pyesë prindërit se çfarë mund të bëjë për të ndihmuar Kler Kalvinin.

7 vjeçarja rezultoi të ishte e prekur nga një lloj tumori në kokë (diffuse instrinsic pontine glioma, DIPG), i cili godet funksionet kryesore të trupit, përfshi këtu të ecurën, shikimin e madje edhe funksione si frymëmarrja e rrahjet e zemrës.

Xhesi kishte rritur një derrkuc në fermën e familjes dhe me ndihmën e prindërve kërkoi ta shesë në një ankand. Shumë prej pjesëtarëve të komunitetit atje janë prekur nga veprimi i 8 vjeçarit, ndërsa derrkuci i Xhesit u shit për 16 mijë dollarë. Disa biznese atje kontribuan po ashtu duke e çuar vlerën në 19 mijë dollarë.

Të gjitha paratë 8 vjeçari ia dhuroi prindërve të Klerit, një veprim që ka përlotur nënën e 7 vjeçares së sëmurë.

“Xhesi është një fëmijë i mrekullueshëm. Sinqerisht nuk më surprizoi fare që atij i shkoi në mendje ideja për të bërë kaq shumë për vajzën time, jemi shumë të prekur”-tha Rejçëll, nëna 39 vjeçare e Klerit.

Nëna e të miturës u shpreh se pas trajtimeve vajza është në gjendje të mirë shëndetësore, ndërsa mjekët vijojnë të punojnë për t’i shpëtuar jetën.