Të kërcënosh nënën me thikë… për të të blerë një birrë

Duket absurde, por ndodh edhe kështu. Një qytetar nga Ferizaj është burgosur me vendim gjykate për një muaj, nën akuzën e kërcënimit me jetë të nënës së tij.

Mediat në Kosovë raportojnë se i riu me inicialet S.S është dënuar nga gjykata me një muaj burg në ambientet e paraburgimit.

Ky person ka kërcënuar nënën e tij, e cila po qëndronte në shtëpi me të bijën. Ka marrë një thikë nga kuzhina dhe ka kanosur nënën duke i thënë se nëse nuk i jep 5 euro për të blerë birra, do ta qëllojë.

Gruaja i ka dhënë paratë dhe pasi i pandehuri ka konsumuar birrën, ka kanosur sërish të ëmën dhe motrën e tij.

“Pas mbajtjes së seancës dëgjimore dhe analizimit të shkresave të lëndës, giyqtari i procedurës paraprake i Divizionit Penal Habib Zeqiri , ka vërtetuar faktin se i dyshuari më 26.04.2021 në shtëpinë e nënës së tij të dëmtuarës E.S. deri sa e njëjta ishte me vajzën e saj, i njëjti kërkon 5 euro për të blerë birra , duke kanosur nënën e tij se nëse nuk ia jep të hollat do ta vret me thikë dhe në atë moment kishte marrë thikën e kuzhinës, me c’rast e dëmtuara detyrohet që t’ia blej birrat. Pas konsumimit të birrave i pandehuri përsëri kanos nënën dhe motrën e tij me thikë , duke iu thënë se do t’i vret, me çka të dëmtuarat detyrohen të largohen nga shtëpia”, thuhet në njoftimim e autoriteteve në Kosovë.