Vajza 11 vjeçe na kërkoi ndihmë për të vëllanë… vogëlushi hyn në operimin që do i sjellë shikimin

Leonisi është veçse 11 muajsh. As një vit nuk ka që ka ardhur në këtë botë, por sytë e tij nuk shohin. Ai ka nevojë për një ndërhyrje në mënyrë që t’i kthehet shikimi.

Por gjendja financiare e familjes së Leonisit, është e dobët. Prindërit e 5 fëmijëve janë të rënduar ekonomikisht, pa të ardhura dhe e kanë të pamundur të paguajnë paratë për ndërhyrjen që i duhet djalit të tyre.

Oligerta, veçse 11 vjeçe, iu drejtua për ndihmë “Fondacionit Firdeus”, me shpresën se fondacioni do ta shërojë vëllain e saj 11 muajsh.

Elvisi e Fatma Naçi shkuan personalisht për të takuar familjen në Librazhd, me lajmin se Fondacioni “Firdeus” do të marrë përsipër kryerjen e ndërhyrjes për Leonisin.

Këtë të enjte, Elvis Naçi lajmëroi se Leonisi i vogël ka hyrë në operim. Me shpresën se gjithçka do të shkojë mirë, lutemi që vogëlushi të mund të shohë për herë të parë.