Fotot, një homazh nga Durrësi për nënat, gratë dhe vajzat që ndërruan jetë prej dhunës
Sot në shkallët e galerisë “Nikolet Vasia” në Durrës, Dita Ndërkombëtare e Gruas ka ardhur krejt ndryshe.
Dhjetëra palë këpucë të kuqe janë ‘shtrirë’ të heshtura në shkallare, si një tribut ndaj nënave, motrave, vajzave e grave që humbën jetën si pasojë e dhunës e krimit në familje.
Iniciativa është marrë nga Teatri ‘Aleksandër Moisiu’ në qytetin bregdetar.
“Çdo këpucë e kuqe vjen si simbol i humbjes së jetës së një gruaje nga dhuna, simbolizon gjakun e atyre grave e vajzave dhe është homazh për to.”- u shpreh për median regjisorja Driada Dervishi.
“Për njerëzit që kanë sjellë këpucët jo vetëm nga Durrësi, primare është ngritja e zërit. I bëj thirrje të gjitha nënave, grave e vajzave që ta ngrenë zërin e tyre.”-tha aktorja Adelina Muça.
Këpucët e kuqe simbolizojnë protestën dhe humbjen e jetëve të shumë grave për shkak të dhunës së burrave. Ato u bënë simbol i mirënjohur në botë, kur në vitin 2009 (në Meksikë) artistja Elina Chauvet i solli ato si formë proteste për tragjedinë që ndodhi me të motrën, e cila u vra nga i shoqi.