I biri u përplas për vdekje, autori u largua! Nëna në lot para gjykatës: 5 vjet burg vlejti jeta e tim biri

Më 17 shtator (2020) në rrugën Fier- Seman, 25 vjeçari Qani Metaj do të përplasej nga një makinë. Pas aksidentit, autori u largua nga vendi i ngjarjes, ndërsa 25 vjeçari ndërroi jetë në rrugë.

Nëna e babai i të ndjerit thonë se ende nuk e kanë në dorë ekspertizën mjeko- ligjore për të kuptuar shkakun e vdekjes së të birit dhe nëse ai do të mund të shpëtonte, sikur autori t’i kishte dhënë ndihmën e parë.

Sot Dallëndyshe e Vullnet Metaj ndodheshin përpara dyerve të gjykatës së Fierit, pasi u dha vendimi për autorin e aksidentit. Ky i fundite kishte përfituar gjykim të shkurtuar dhe u dënua me 5 vite e 4 muaj burg. Vendimi për prindërit e 25 vjeçarit të ndjerë, është konsideruar fare qeshkarak.

“Unë jam nëna e të ndjerit Qani Metaj. Pas meje ndodhet gjykata që ka gjykuar vdekjen e djalit tim. Para 11 muajsh ma vranë djalin dhe ma lanë në kanal, ai që ma vrau djalin është larguar nga vendi i aksidentit. Pas një zvarritje nga prokuroria, jemi ankuar edhe te Kryeprokurori. Pas bërjes mediatike për herë të parë pas 15 ditësh filloi gjyqi i parë, dje u mor një vendim i paprecedent, qesharak absolutisht.

A vallë vlen jeta e një 25-vjeçari 5.4 vite burg? A ky është shteti jonë? A kjo është drejtësia në vendin tonë? Ne kemi kërkuar gjykim normal, por gjyqtarja pranoi gjykimin e shkurtuar, kur Instituti i Lartë i Drejtësisë ka dhënë përfundimin fajtor në gjendje të rënduar, pasi kishte precedent penal të tjerë dhe braktisi viktimën. Ne kërkojmë nga gjyqtarja nëse djalit i ka ardhur vdekja nga përplasja me makinën apo mbytja në kanal. Gjyqtarja nuk pranoi këtë por gjykimin e shkurtuar duke e dënuar me 5.4 vite.

Pretendimet dhe kërkesat tona nuk janë marrë parasysh. Ne kërkuar një gjë të thjeshtë, nga se i erdhi vdekja djalit? Fajtori të dënohet plus për vrasjen, por edhe braktisjen. U mor parasysh vetëm cfarë kërkoi pala tjetër. Ne do të shkojmë te ambasadorja Yuri Kim. Unë do të shkoj deri në Hagë, nuk ka shanse të shkeli dikush gjakun e djalit tim. Po kërkoj vetëm drejtësi dhe do ta kërkoj deri në pafundësi. Kjo është vrasje për herë të dytë” tha ajo.