“I vetmi vend ku luan Deani është spitali…. për ne, ai është gjithçka kemi”
Të dy janë ende fëmijë dhe në mendjet e tyre flë një frikë e madhe… po sikur nesër, vëllai i tyre 9 vjeç të mos jetë më? Po sikur Deani të largohet?
Me zërin që i dridhet e lotët që nuk pushojnë vëllai e motra e Deanit, luten që ajo ditë të mos vijë kurrë. Ana, motra e 9 vjeçarit, nuk resht dot së lotuari për të vëllanë. Thotë se ai është gjithçka për atë dhe se e ka në mendje çdo moment.
Motra: Deani është për mua gjithë bota. Më mungon shumë. Se di a mund ta kalojë apo jo, shumë frikë kam. Dua që të gjithë ta ndihmojnë me aq sa kanë dhe ta dërgojmë jashtë shtetit që ta shpëtojmë. Nuk e mendoj dot, nuk jetoj dot pa të, e dua shumë… është gjithçka që kam.
Vëllai: Kërkon që të vijë në shtëpi, por s’mundet. Ato herë që vjen këtu, pëson kriza dhe duhet të shkojë sërish në spital. Shkojmë atje për të luajtur, se i vetmi vend ku luan Deani është spitali… po ai mund të vdesë. Nuk dua që ta humb, është gjithçka për mua.
Ju lutem na ndihmoni, ju jeni shpresa jonë e vetme.