“Këmba po më thahet, dhimbjet nuk pushojnë” Historia përlotëse e Liries, shqiptarët i dolën në krah

Gjatë gjithë jetës së saj ndihmoi motrat e vëllezërit. Babai i vdiq qëkur ajo ishte në moshë të re. Liria vendosi të fillojë punën që fëmijë, për të ndihmuar nënën dhe për t’i dalë në ndihmë motrave e vëllezërve më të vegjël. Sakrifikoi të gjithë jetën e saj për të ndihmuar familjen. Provoi gjatë viteve dhimbje të mëdha, dy motra e dy vëllezër i ndërruan jetë. Pak vite më parë, pësoi dhe një goditje të madhe, nëna, personi më i shtrenjtë, ndërroi jetë.

Në kushte të vështira ekonomike, Liria pësoi një incident që e la në kushte edhe më të rënda. Ky është rrëfimi i saj për “Shqiptarët për Shqiptarët”.

Liria: E pamundur jam, s’mundem ta përballoj më këtë jetë. Më shumë jam rritur pa bukë sesa me bukë. Babi na la jetimë shumë të vegjël, në punë kam dal që e re për të ndihmuar motrat e vëllezërit, mamin. Vendosa të mos martohem, të bëhem krah me mamin… dy motra e dy vëllezër më vdiqën. 5 vite ka që më ka vdekur nëna, më la…

Nuk kisha ku të shkoja, në pemë shkova një ditë për të mbledhur hurma, për të ngrënë. Dega u thye dhe rashë. Rashë në majën e shtyllës së betonit. U çava në bark, theva dorën, kam thyer dhe tre rruaza të shtyllës. Djali i vëllait më uli poshtë nga shtylla, në spital… ndenja dy javë e më thonin doktorët, je për operim. Ne nuk kishim para, ishim shumë të varfër. Në ortoped kam shkuar i cili më tha se më duhej të paktën një protezë. Nga skamja, unë s’kam ku shkoj, jam e pamundur. Këmba nuk më funksionon më, po më thahet… as ilaçet s’më bëjnë efekt, po më lë këmba. Shpresën e kam tek Zoti e Elvis Naçi, kërkoj vetëm një operim sepse dhimbjet s’i duroj dot më.

Por bamirësia mes shqiptarëve nuk ka vdekur. Sidriti e Meri shkuan ta vizitojnë Lirien, për t’i dhënë lajmin e mirë.Liria i tregon atyre disa momente të vështira të jetës. Sidriti e Meri s’mundën t’i mbajnë dot lotët kur Liria u rrëfente sakrificat e shumta që bëri e sesa e gëzuar do të kishte qenë nëna e saj e ndjerë, nëse do të kishte qenë prezente për të mësuar se e bija do të mund të operohej.

Liria hyri në operim dhe fatmirësisht gjithçka shkoi mirë. Sidriti e Meri Bejleri shkuan ta vizitojnë Lirien dhe ajo ishte tashmë në këmbë, nga ku tha fjalë nga zemra.

“Ju falenderoj pa masë, jeni të mrekullueshëm. Zoti ju bekoftë.”